12 май Президенти Ҷумҳурии Тоҷикистон Эмомалӣ Раҳмон ҷиҳати иштирок дар тантанаҳои ҷашнии 5-умин солгарди мақоми давлатӣ гирифтани ансамбли "Шашмақом" ба Хонаи радио омад. Сарвари давлат нахуст намоишгоҳи дастовардҳои санъати миллӣ ва касбии Тоҷикистонро тамошо намуда, барои боз ҳам ғанитару пурмӯҳтаво гардидани осори мусиқии ниёгон ва муосир дастуру маслиҳатҳои судманд дод.
Аз рӯзи ба имзо расидани Фармони Президенти Ҷумҳурии Тоҷикистон Эмомалӣ Раҳмон дар бораи ба ансамбли шашмақомхонони ба номи Фазлиддин Шаҳобови Кумитаи телевизион ва радиои назди Ҳукумати Ҷумҳурии Тоҷикистон додани мақоми давлатӣ 5 сол сипарӣ гардид.
Барномаи ҳунарии идонаро устодони санъати ҷумҳурӣ, аъзои ансамбли давлатии шашмақомхони ба номи Фазлиддин Шаҳобови Кумитаи телевизион ва радиои назди Ҳукумати Ҷумҳурии Тоҷикистон оғоз намуданд.
Аҳли толор аз маҳорати беназиру нотакрори шашмақомхонон ба ваҷд омада, суруду таронаҳои пурҷозиба, оҳангҳои дилчаспу рӯҳнавозро бо самимияти афзун истиқбол намуданд.
Ҳунармандони дастаҳои ҳунарии "Дарё", "Гулрез", ансамбли давлатии "Фалак"-и Кумитаи телевизион ва радиои назди Ҳукумати Ҷумҳурии Тоҷикистон ва дигар санъаткорони шинохтаи кишвар ҳамкасбони худро бо ҷашни 5-умин солгарди мақоми давлатӣ гирифтани ансамбли "Шашмақом" шодбош гуфта, дастовези мусиқии худро пешниҳод намуданд.