15 август Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Ҳиндустон Доктор Авул Пакир Ҷайнулабдин Абул Калом барқияи шодбошӣ фиристод, ки дар он аз ҷумла гуфта мешавад:
"Сарфарозам, ки Ҷаноби Олӣ ва мардуми дӯсти Ҷумҳурии Ҳиндустонро ба муносибати фаро расидани солгарди ҷашни бузурги Истиқлол самимона табрик ва таҳният менамоям.
Тоҷикистон ба сатҳи имрӯзаи равобит ва муносибатҳои анъанавии дӯстонаи ҳар ду кишвар баҳои баланд дода, ҷонибдори таҳкиму густариши ҳарчи бештари онҳо мебошад.
Итминони комил дорам, ки Тоҷикистону Ҳиндустон метавонанд дар соҳаҳои мухталифи иқтисодиёту фарҳанг, технологияву иттилоот ва арсаҳои дигар ҳамкории васеъ ва бунёдиро рушди пайгир диҳанд, ки бешак ба нафъи ҳар ду кишвари дӯст, субот ва амният дар Осиёи Марказӣ ва Ҷанубӣ аст. Мо барои дастёбӣ ба ин ҳадаф тамоми талошу кӯшишро ба харҷ хоҳем дод.
Ба Ҷаноби Олӣ хушбахтиву сиҳатмандӣ ва ба мардуми дӯсти Ҳиндустон комгорӣ ва саодатро хоҳонам".