19 август Президенти Ҷумҳурии Тоҷикистон Эмомалӣ Раҳмон ба ноҳияи Восеъ омада, нахуст аз ёдгории беназири таърихии Ҳулбук боздид намуд.

Тадқиқотҳо нишон доданд, ки дар Қалъаи Ҳулбук хатҳои обгузаронӣ ва шабакаи гармидиҳӣ истифода мешудаанд, ки аз санъати баланди шаҳрдории аҷдодони мо шаҳодат медиҳанд. Ҷасадҳои пайдошудаи аз 2 то 2,5 метраи мардону занон далели азимҷуссагию қоматбаландии гузаштагони мост.

Сарвари давлат ба роҳбарони вазорату идораҳои дахлдор баҳри вусъати тадбирҳои археологию навсозии қалъа бо ҷалби мутахассисони ҷавон аз Академияи улум ва донишгоҳу донишкадаҳо вазифа гузошт.

Президенти Ҷумҳурии Тоҷикистон Эмомалӣ Раҳмон зимни шиносоӣ бо ин муҷтамааи таърихӣ зикр намуд, ки ёдгории бостонии Ҳулбук яке аз иншооти марказии ҷашни 2700 -солагии шаҳри Кӯлоб мебошад ва то рӯзҳои ин чорабинии муҳим бояд дар сатҳи олӣ барқарор ва таъмиру таҷдид ёбад.

Дар ноҳияи Восеъ раванди бунёдкорӣ авҷ мегирад. Ояндаи наздик 5 бинои мактаб комилан таъмиру таҷдид карда мешавад. Дар соҳаи кишоварзӣ нишондиҳандаҳо умедбахшанд. Дар хоҷагии деҳқонии "Хоҷамӯъмин" Президенти Ҷумҳурии Тоҷикистон Эмомалӣ Раҳмон натиҷаи кори деҳқононро, ки аз аввалинҳо шуда, ба ғунучини ҳосили пахта шурӯъ намуданд, мусбат арзёбӣ кард.