Президенти Ҷумҳурии Тоҷикистон

Иштирок дар конфронси байналмилалии илмӣ дар мавзӯи "Абӯалӣ ибни Сино ва тамаддуни ҷаҳонӣ"

06.09.2005 12:00, шаҳри Душанбе

6 сентябр дар шаҳри Душанбе бахшида ба 1025 - солагии адиб, файласуф, олим ва мутафаккири бузурги халқи тоҷик Шайх-ур-раис Абӯалӣ ибни Сино конфронси байналмилалии илмӣ дар мавзӯи "Абӯалӣ ибни Сино ва тамаддуни ҷаҳонӣ" баргузор гардид, ки дар кори он олимони барҷастаи синошиноси Тоҷикистон ва як қатор кишварҳои дигари хориҷи дуру наздик ба мисли Эрон, Афғонистон, Фаронса, Россия, Белорус, Қазоқистон, Қирғизистон ва дигар мамомолики ҷаҳон ширкат доранд.

Президенти Ҷумҳурии Тоҷикистон Эмомалӣ Раҳмон дар расми кушодашавии конфронс иштирок ва суханронӣ намуд.

Сарвари давлати Тоҷикистон аз осори гаронбаҳои Шайх-ур-раис Абӯалӣ ибни Сино дар илмҳои тиббу риёзиёт, табиатшиносию фалсафа, таърих ва фарҳангу адаб ёдовар шуда, аз ҷумла таъкид дошт, ки офаридаҳои ин фарзанди фарзонаи миллати тоҷик обрӯю эътибори ӯ ва мардуми соҳибфарҳанги моро дар тамоми олам хеле боло бурдааст. Бахусус "Қонуни тибб"-и Ибни Сино то асри 20 мелодӣ сарчашмаи асосии улуми тиб ва китоби рӯимизии тамоми табибони олами Ғарб гашта буд.

Дар ҷаласаи умумии конфронс, ки бо иштироки Президенти Ҷумҳурии Тоҷикистон Эмомалӣ Раҳмон ҷараён гирифт, баъди суханронии Сарвари давлат Президенти Академияи илмҳои Ҷумҳурии Тоҷикистон Маҳмадшо Илолов, синошиносони машҳури арсаи ҷаҳонӣ профессор М. Рожанская (Россия), академик М. Диноршоев (Тоҷикистон), профессор Ю. Нуралиев (Тоҷикистон) бо маърӯзаҳои илмӣ баромад намуда, саҳми оламшумули фарзанди фарзонаи миллати тоҷик Шайх-ур-раис Абӯалӣ ибни Синоро дар рушду камоли ҷанбаҳои гуногуни улуми ҷаҳонӣ мавриди таҳлилу баррасӣ қарор доданд.

Зимни суханронии худ онҳо ҳамчунин ба таваҷҷӯҳи Президенти Ҷумҳурии Тоҷикистон Эмомалӣ Раҳмон ба масоили илму маърифат, аз ҷумла омӯзиши осори Ибни Сино баҳои баланд дода, таъкид доштанд, ки дар амал татбиқ гаштани пешниҳоду тавсияҳое, ки аз ҷониби Сарвари давлати Тоҷикистон садо доданд, дар роҳи омӯзиши ҳамаҷониба ва ба мардум дастрас гаштани нигоштаҳои Шайх-ур-раис натиҷахои назаррас ба даст меоранд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520