24 октябр Президенти Ҷумҳурии Тоҷикистон Эмомалӣ Раҳмон ба Дабири Кулли Созмони Милали Муттаҳид Кофи Аннан барқияи табрикӣ ирсол намуд, ки дар он аз ҷумла омадааст:
"Хушҳолам, ки Шуморо аз номи Ҳукумати Ҷумҳурии Тоҷикистон ва шахсан аз ҷониби худам ба муносибати ҷашни фархундаи 60-солагии Созмони Милали Муттаҳид табрик мегӯям.
Шаст сол боз тақдири сулҳ бо фаъолияти СММ - созмони мӯътабартарини байналмилалӣ ва механизми универсалии таъмини сулҳу амнияти ҷаҳон алоқаи мустаҳкам дорад.
СММ ба душворию мураккабиҳои таърих нигоҳ накарда, дар давоми ин солҳо ягона маркази нодири гуфтӯгӯи муттасил ва ҳамаҷонибаи ҳамаи миллатҳо бобати барқарор намудани сулҳу субот ва муайян кардани асосҳои тартиботи нави сайёра гардид.
Имрӯз ҷаҳони мо хеле тағйир ёфтааст. Давраи интихоби байни ҷангу амонӣ гузашта ва башарият ба давраи нави суботу рушд гузашт, ки дар шароити он СММ бояд мақоми марказию тағйирнаёбандаро касб намояд. Дар ҷараёни машварати ба қарибӣ доиршуда, ки воқеаи бузурге на фақат дар сарнавишти минбаъдаи созмон, балки тамоми ҷомеаи ҷаҳон ва ҳамаи низоми муносибатҳои байналмилалӣ низ гардид, инро ҳамаи давлатҳои аъзои СММ тасдиқ намуданд.
Мехостам ба Шумо барои ташаббусҳои Тоҷикистонро дар арсаи байналмилалӣ шахсан дастгирӣ карданатон миннатдории хоса баён намоям. Мақсад аз ин ташаббусҳо таъмини суботу амният ва таҳкими вазъияти боварию ҳамкории мутақобила ва рӯҳи ҳамкорӣ дар минтақа ва ҷаҳон мебошад.
Ба муносибатҳои байни Ҷумҳурии Тоҷикистон ва СММ аҳамияти бузург дода, мехоҳам изҳори боварии амиқ намоям, ки рушди густариши минбаъдаи онҳо ба фароҳам омадани дурнамои васеи ҳамкории зичу самарабахшамон мусоидат мекунад.
Иҷозат диҳед, Ҷалолатмаоб, ба Шумо тансиҳатии бардавому беҳбудӣ ва ба Созмони Милали Муттаҳид барои расидан ба мақсадҳои олию наҷиб бурдбориҳо таманно кунам".