Нимаи дуюми рӯзи 7 май Президенти Ҷумҳурии Тоҷикистон бо истифода аз ҳуқуқи ташаббуси қонунгузорӣ дар асоси моддаи 58 Конститутсияи (Сарқонуни) Ҷумҳурии Тоҷикистон лоиҳаи Қонуни Ҷумҳурии Тоҷикистонро «Дар бораи бардоштани татбиқи ҷазои қатл» ба Маҷлиси намояндагони Маҷлиси Олӣ пешниҳод намуд.

Мақсад аз таҳия ва пешниҳод намудани лоиҳаи Қонуни мазкур аз он иборат мебошад, ки инсон, ҳуқуқ ва озодиҳои он арзиши олӣ ва дахлнопазир буда, дар миёни онҳо ҳуқуқ ба ҳаёт мавқеи махсус дорад.

Бо назардошти ҳамин дар Ҷумҳурии Тоҷикистон доир ба татбиқи ҷазои қатл дар Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 30 апрели соли ҷорӣ моратория эълон гардид, ки он зарурати таҳияи лоиҳаи Қонуни Ҷумҳурии Тоҷикистон «Дар бораи боздоштани татбиқи ҷазои қатл» - ро ба миён овардааст.

Лоиҳаи Қонуни мазкур ба муҳофизат ва таъмини ҳуқуқу озодиҳои инсон ва ба меъёрҳои башардӯстона мутобиқ намудани муқаррароти Кодекси ҷиноятии Ҷумҳурии Тоҷикистон равона карда шудааст.

Аз ҷониби Президенти Ҷумҳурии Тоҷикистон Эмомалӣ Раҳмон пешниҳод гаштани лоиҳаи ин санади муҳими ҳуқуқӣ бори дигар шаҳодати равшани сиёсати одилона ва башардӯстонаи Сарвари давлати Тоҷикистон мебошад.