7 январ Президенти Ҷумҳурии Тоҷикистон Эмомалӣ Раҳмон ҳайати Сенати Конгресси ИМА-ро бо сарварии Ҷозеф Либерман ва Ҷон Маккейн ба ҳузур пазируфт.
Зимни муҳокимаи масъалаҳои минтақавию байналмилалии муҳим мусоҳибон ба дурнамои ҳалли қазияи Афғонистон диққати махсус доданд. Ҳамчунин мавзӯи ҳамгироии Тоҷикистону Амрико дар доираи кӯшишҳои ҷомеаи ҷаҳонӣ ҷиҳати мусоидат кардан ба ташаккули Афғонистони осуда ва расондани кӯмаки башардӯстона ба мардуми он баррасӣ гардиданд.
Дар робита бо муҳокимаи масъалаҳои ҳамкории дуҷониба ҷиҳати мубориза бар зидди терроризми байналмилалӣ, экстремизм, хатари маводи мухаддир ва дигар таҳдидҳои глобалии муосир Президенти Ҷумҳурии Тоҷикистон Эмомалӣ Раҳмон тағйирнопазирии мавқеи Тоҷикистонро нисбати ҳамгироӣ бо кишварҳои эътилофи зиддитеррористии байналмилалӣ таъкид намуд.
Мусоҳибон ҳамчунин ҳолат ва имкониятҳои ҳамкории дуҷонибаро дар соҳаҳои гуногун муҳокима карданд.