Президенти Ҷумҳурии Тоҷикистон

Ифтитоҳи бинои нави таълимии мактаби № 14-и деҳаи Унҷии ноҳияи Бобоҷон Ғафуров

23.03.2017 10:46, ноҳияи Бобоҷон Ғафуров

Рӯзи аввали сафари кории Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд аз мавриди баҳрабардорӣ қарор додани бинои нави таълимии Муассисаи таҳсилоти миёнаи умумии № 14-и деҳаи Унҷии ноҳияи Бобоҷон Ғафуров оғоз гардид.

Сарвари давлатро дар саҳни бинои мактаби мазкур хонандагону устодони ин даргоҳи таълимӣ самимона истиқбол гирифтанд. Сипас дар вазъи мутантан бо буридани лентаи рамзӣ Пешвои миллат ба фаъолияти бинои нави таълимии Муассисаи таҳсилоти миёнаи умумии № 14 оғоз бахшиданд.

Сарвари давлат ҳангоми боздид аз синфхонаҳои мактаб ва шиносоӣ бо шароиту имкониятҳои дар он мавҷудбуда иброз намуданд, ки бинои мактаб дар муҳлати кӯтоҳ, яъне 9 моҳ пурра сохта ва мавриди баҳрабардорӣ қарор дода шудааст. Дар мактаби мазкур ба ғайр аз бинои нав биноҳои кӯҳна низ фаъол буда, дар маҷмӯъ 1900 хонанда ба таълим фаро гирифта мешаванд. Дар муассисаи таълимии мазкур 130 омӯзгори соҳиби маълумоти олӣ фаъолият доранд.

Воқеан бинои нави таълимии Муассисаи таҳсилоти миёнаи умумии № 14 намои хеле зебо дошта, бо тарҳу услуби меъмории ҳозиразамон бунёд ёфтааст. Бинои мактаб сеошёна буда, он барои 1080 ҷойи нишаст бо назардошти таҳсил дар 2 баст тарҳрезӣ карда шудааст. Дар бинои асосии мактаби нав утоқҳои кории муаллимон ва 18 синфхонаи фаннӣ, аз ҷумла синфхонаҳо аз фанҳои астрономия, физика, химия ва информатика, ки бо тамоми лавозимоти таълимии ҳозиразамон муҷаҳҳаз шудаанд, ҷойгиранд.

Бинои мактаби нав дорои толори варзишии барҳаво низ мебошад, ки он барои бозиҳои волейбол, баскетбол, теннис ва футболи хурд пешбинӣ шудааст. Барои тамошобинон бошад 200 ҷойи нишаст ташкил карда шудааст. Дар ҳавлии мактаб инчунин ду майдончаи варзишӣ барои бозиҳои волейбол ва баскетбол ҷойгир мебошад. Бояд гуфт, ки бинои мактаби нав аз ҷониби ҶДММ Раёсати сохтмонии "Барқарор" дар муддати кӯтоҳ бо харҷи 8,5 миллион сомонӣ бунёд гардидааст.

  Пас аз мавриди баҳрабардорӣ қарор додани бинои нави таълимии Муассисаи таҳсилоти миёнаи умумии №14, Президенти Ҷумҳурии Тоҷикистон муҳтарам Эмомалӣ Раҳмон бо хонандагону омӯзгорон, аҳли ҷамоатчигӣ ва фаъолони ноҳия мулоқоти самимона анҷом доданд.

Сарвари давлат дар суханронии худ зикр карданд, ки соҳаи маориф дар сиёсати давлат аз бартариятҳои хоса бархурдор мебошад. Сабаб дар он аст, ки ба воситаи муассисаҳои таълимӣ, аз боғча сар карда, то мактаби миёнаю донишгоҳу донишкада мо насли соҳибмаърифатро ба воя мерасонем, ки дар оянда мутахассиси касбӣ шуда, саҳмашонро барои пешрафти кишварамон гузоранд.

Дар вохӯрӣ ҳамчунин хонандагон ва сокинон низ ба сухан баромада, миннатдории хешро ба Сарвари давлат барои бунёди ин мактаби наву замонавӣ ва умуман корҳои бузурги ободонию созандагӣ дар ҷумҳурӣ баён намуданд.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520