Имрӯз Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сохтори роҳбарикунандаи Мақомоти иҷроияи маҳаллии ҳокимияти давлатии шаҳрҳои Хуҷанд ва Истаравшани вилояти Суғд тағйироти кадрӣ ба амал оварданд.

Бо фармонҳои Президенти Ҷумҳурии Тоҷикистон Шарифзода Шариф Файз бо сабаби ба кори дигар гузаштанаш аз вазифаи раиси шаҳри Хуҷанди вилояти Суғд озод ва ба ҷойи ӯ Муҳаммадзода Маъруф - раиси шаҳри Хуҷанди вилояти Суғд таъин карда шуд.

Набизода Наим бо сабаби ба кори дигар гузаштанаш аз вазифаи раиси шаҳри Истаравшани вилояти Суғд озод ва Иноятзода Баҳром - иҷрокунандаи вазифаи раиси шаҳри Истаравшани вилояти Суғд таъин гардид.