Президенти Ҷумҳурии Тоҷикистон

Иштирок ва суханронӣ дар ҷаласаи умумии Конфронси СММ оид ба рушди устувор

21.06.2012 08:00, Бразилия

Имрӯз Президенти Ҷумҳурии Тоҷикистон Эмомалӣ Раҳмон дар ҷаласаи умумии Конфронси Созмони Милали Муттаҳид оид ба рушди устувор, ки дар шаҳри Рио-де-Жанейрои Бразилия ифтитоҳ гардид, иштирок ва суханронӣ намуд.

Бояд тазаккур дод, ки Конфронсро Дабири кулли СММ Пан Ги Мун ҳусни оғоз бахшид. Конфронс бо як овоз Президенти Бразилия Дилма Русефро раиси Конфронс ва Президенти Тоҷикистон Эмомалӣ Раҳмонро яке аз муовинони у интихоб намуд.

Сипас аз байни бештар аз 140 сарони давлат ва ҳукуматҳои кишварҳои олам аввалин шуда, Президенти Тоҷикистон Эмомалӣ Раҳмон нутқ эрод намуд.

Дар суханронии худ Сарвари давлат Эмомалӣ Раҳмон ба Стратегияи миллии рушд, ки аз Ҳадафҳои Рушди Ҳазорсола бармеояд ва мағзи мӯҳтавои онро се масъалаи асосӣ – ноил шудан ба истиқлолияти энергетикӣ, аз бунбасти нақлиётиву коммуникатсионӣ баровардани кишвар ва таъмин намудани амнияти озуқавории мамлакат ташкил медиҳанд, таваҷҷӯҳи хоса зоҳир кард.

Тавре Президенти кишвар таъкид сохт, тибқи ин Стратегия истифодаи самаранок ва сарфаи захираҳои табиӣ, ки унсури асосии иқтисоди «сабз»-ро таҷассум менамоянд, инчунин инкишофи бахши иҷтимоӣ ва ҳифзи низоми экологӣ ҷузъи таркибии ислоҳоти дар Тоҷикистон татбиқшавандаро ташкил медиҳанд.

«Дастрасии фарогир ба хадамоти энергетикаи муосир, баланд бардоштани самаранокии энергетикӣ, тавсеаи истифодаи манбаъҳои таҷдидшавандаи энергия масъалаҳои муҳимтарини рушди устуворанд», - иброз дошт Эмомалӣ Раҳмон.

Зимни баромади худ Роҳбари давлат Эмомалӣ Раҳмон ҷонибдории Тоҷикистонро нисбати ташаббуси Дабири кулли Созмони Милали Муттаҳид таҳти унвони «Энергетикаи устувор барои ҳама» изҳор намуд.

Ба қавли Президенти Тоҷикистон, «истифодаи гидроэнергетика ба консепсияи иқтисоди «сабз», ки яке аз мавзӯъҳои асосии ҷадвали кори Конфронси Рио+20 аст, комилан мутобиқат дорад».

Дар робита ба нақши бузурги ҳамкорӣ дар соҳаи захираҳои об дар амри ноил шудан ба ҳадафҳои рушд, Эмомалӣ Раҳмон аз эълон шудани соли 2013 ҳамчун «Соли байналмилалии ҳамкорӣ дар соҳаи об» аз ҷониби Маҷмаи Умумии СММ бо ташаббуси Тоҷикистон махсус хотиррасон шуд.

Ҳамчунин, Сарвари давлат Эмомалӣ Раҳмон таваҷҷӯҳи ҳозиринро ба се масъалаи ба ҳам пайванди экологию иқтисодӣ ва иҷтимоӣ – тағйирёбии иқлим, офатҳои табиӣ ва рушди устувори манотиқи кӯҳистон ҷалб намуд. Ӯ изҳори умедворӣ кард, ки ниҳодҳои байналмилалӣ ва кишварҳои мададрасон пешниҳоди Тоҷикистонро оид ба таъсиси Хазинаи байналмилалии ҳифзи пиряхҳо ҷонибдорӣ хоҳанд намуд.

Дар поёни суханронӣ, Президенти Тоҷикистон ҷонибдории кишварро аз баррасии масъалаҳои таҳкими чорчӯбаи ниҳодии рушди устувор ва таъсиси мақоми байниҳукуматии сатҳи баланд оид ба рушди устувор, ҳамчунин роҳандозии раванди таҳияи маҷмӯи мувофиқашудаи ҳадафҳои фарогир дар соҳаи рушд иброз дошт.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520