Президенти Ҷумҳурии Тоҷикистон

Ифтитоҳи маркази байналмилалии савдо ва хизматрасонии Ҳисор

18.09.2020 08:02, шаҳри Ҳисор
Ифтитоҳи маркази байналмилалии савдо Ифтитоҳи маркази байналмилалии савдо ва хизматрасонии Ҳисор   18.09.2020ва хизматрасонии Ҳисор   18.09.2020

18 сентябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар шаҳри Ҳисор ба фаъолияти маркази байналмилалии савдо ва хизматрасонӣ оғози расмӣ бахшиданд.

Маркази калони байналмилалии савдо ва хизматрасонии “Ҳисор” дар кӯчаи Уроқ Аловиддинов ҷойгир буда, бо тарҳи хело зебо ва замонавӣ бунёд гардидааст.

 Иншооти муосир аз 3 ошёна иборат аст ва дорои шароиту имконоти мусоиди хизматрасонии сатҳи баланд мебошад.

Бинои наву замонавӣ дар масоҳати умумии 16 ҳазор метри мураббаъ сохта шуда, барои идомаи фаъолияти соҳибкорӣ ва рушди минбаъдаи соҳаи саноат дар мамлакат макони мусоиди корию хизматрасонӣ ба ҳисоб меравад.

Маркази байналмилалии савдо ва хизматрасонии “Ҳисор” дар доираи тадбирҳои ободонӣ баҳри сазовор истиқбол намудани ҷашни 30 - солагии Истиқлоли давлатии Ҷумҳурии Тоҷикистон, мутобиқ сохтани сифати савдою хизматрасонӣ ба талаботи бозори ҷаҳонӣ ва татбиқи ҳадафи чоруми миллӣ - саноатикунонии босуръати мамлакат аз ҷониби Ҷамъияти саҳҳомии кушодаи “Авитсена” сохта ба истифода дода шуда, дар доираи ҳамкориҳои минбаъдаи тиҷоратӣ хати истеҳсолии беш аз 60 корхонаи бонуфузи вилояти Сичуани Ҷумҳурии Мардумии Чин ворид карда мешавад, ки ин раванд ба рушди ояндаи соҳаи саноати мамлакат такони ҷидди мебахшад.

Аснои шиносоӣ ба Пешвои миллат муҳтарам Эмомалӣ Раҳмон иттилоъ дода шуд, ки маркази муосири байналмилалӣ дар доираи ҳамкориҳои судманди Ҷумҳурии Тоҷикистон бо Ҷумҳурии Мардумии Чин ҷиҳати таъсиси коргоҳу корхонаҳои нави истеҳсолӣ, муаррифии маҳсулоти истеҳсоли ватанӣ ва ба роҳ мондани содироти он ба хориҷи мамлакат, ташкили ҷойҳои нави корӣ ва рушди иқтисодиёти миллӣ, ки яке самтҳои асосии сиёсати пешгирифтаи роҳбарияти олии давлат ва Ҳукумати мамлакат ба ҳисоб меравад, бунёд гардида, ояндаи наздик бо амалишавии ҳадафҳо беш аз 800 нафар сокини маҳаллӣ бо ҷойи корӣ доимӣ таъмин мешаванд.

Дар ин бино барои дастрасии аҳолӣ ва дар доираи ҳамкориҳои муштарак ба роҳ мондани содироти техникаву механизмҳои кишоварзии истеҳсоли ватанӣ ба кишварҳои ҳамсоя, ки феълан 30 намуди он дар Ҷамъияти саҳҳомии пушидаи “Агротехсервис”-и шаҳри Ҳисор васлу насб карда мешаванд, шароити мусоиди намоиш ва фуруши тракторҳо муҳайё гардидааст.

Мавриди зикр аст, ки марҳилаи аввали корхонаи муштараки Тоҷикистону Беларус 16 майи соли 2018 бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Беларус муҳтарам Александр Лукашенко мавриди истифода қарор дода шуда, дар он асосан васлу насби трактор ва таҷҳизоти соҳаи кишоварзӣ анҷом дода мешавад.

Ба Сарвари давлат иттилоъ дода шуд, ки дар 8 моҳи соли 2020 ба маблағи 9,4 миллион сомонӣ техникаи кишоварзӣ истеҳсол гардидааст, ки ин нишондод нисбат ба ҳамин давраи соли 2019 зиёд мебошад.

Аз замони оғози фаъолияти корхонаи мазкур, ки мақсади асосии таъсиси он дар Ҷумҳурии Тоҷикистон коҳиши воридоти маҷмӯи ин намуди техникаҳои кишоварзӣ ба ҳисоб мерафт, имрӯз ба ҳадафҳои худ расид ва дар доираи ҳамкориҳои судманд трактор ва дигар намуди техникаҳои кишоварзии истеҳсоли ватанӣ ба давлатҳои ҳамсоя содирот карда мешавад.

Пешвои муаззами миллат муҳтарам Эмомалӣ Раҳмон аз шароити муосири маркази байналмилалӣ, ки дар қаламрави Тоҷикистон яке аз аввалинҳо ба шумор меравад, шинос шуда, иқдоми соҳибкори ватанӣ Комил Холиқовро ҷиҳати бунёди чунин як бинои боҳашамати дорои имкониятҳои васеи хизматрасонӣ ва ҷалби шарикони рушд, ки ба пешрафти соҳаи савдою саноат заминаи мусоид мегузорад намунаи ибрат хонданд. Таъкид гардид, дар Тоҷикистон барои дастгирии соҳибкорон тамоми имконот мавҷуд мебошад ва онҳо бо истифода аз имтиёзҳои пешбининамудаи давлат ва Ҳукумати мамлакат метавонанд дар тадбирҳои ободонӣ саҳми босазои худро гузоранд.

Дар маркази байналмилалии савдо ва хизматрасонии “Ҳисор” ба Президенти мамлакат ҳамзамон намунаи зиёди маҳсулоти саноатии корхонаҳои истеҳсолии шаҳри Ҳисор, ки дар ошёнаи сеюми бино ҷойгир аст муаррифӣ гардид. Дар ин ҷо маҳсулоти истеҳсолнамудаи 30 корхонаи саноатӣ, аз ҷумла маҳсулоти корхонаҳои “Авитсена”, “Висол”, “Корвони аср”, “Истеҳсоли қубур ва профилҳои тоҷик”, “Файзи истиқлол” ва дигар ширкатҳое, ки айни ҳол фаъолияти пурсамар доранд, намоиш дода шуд.

Маврид ба таъкид аст, ки дар замони истиқлоли давлатӣ бо дастгирии бевоситаи Пешвои миллат муҳтарам Эмомалӣ Раҳмон, татбиқи барномаҳои давлатӣ ва саҳми соҳибкорони ватанӣ соҳаи саноати шаҳри Ҳисор ба пешравиҳои назаррас ноил гардида, бо бунёду навсозии 69 коргоҳу корхонаи саноатӣ 1 ҳазору 208 нафар сокини маҳаллӣ бо ҷойи кори доимӣ таъмин шуданд.

Тавре таъкид гардид шуруъ аз соли 2018 дар доираи иқдомҳои созанда ба ифтхори 30 - солагии Истиқлоли давлатӣ ҷиҳати ташкили ҷойҳои нави корӣ, қонеъ сохтани талаботи аҳолӣ бо маҳсулоти худӣ ва содироти маҳсулоти ивазкунандаи воридот ба хориҷи мамлакат 14 корхонаи нави саноатӣ сохта мавриди истифода қарор дода шуд, ки маблағи умумии истеҳсоли маҳсулот дар 8 моҳи соли ҷорӣ аз ҳисоби маҷмуи корхонаҳо 144 миллион сомониро ташкил медиҳад. Ин нишондод нисбат ба ҳамин давраи соли гузашта 13,5 миллион сомонӣ зиёд мебошад. Айни ҳол бо дастгирии Ҳукумати мамлакат ва саҳми соҳибкорон корҳои сохтмонӣ дар 8 корхонаи нави саноатӣ вусъат дошта, бештари онҳо соли 2021 мавриди истифода қарор мегиранд.

Дар ҳамин ҷо Президенти Ҷумҳурии Тоҷикистон муҳтарам Эмомалӣ Раҳмон ба соҳибкор ва масъулони корхонаҳои истеҳсолӣ, ки дар татбиқи яке аз ҳадафҳои стратегӣ - саноатикунонии босуръати мамлакат саҳми назаррас доранд, ҷиҳати зиёд намудани иқтидори истеҳсолии маҳсулоти хушсифати ватанӣ, тақвияти ҳамкориҳои судманд бо шарикони рушд ва ба роҳ мондани содироти он ба хориҷи кишвар, ки ба рушди иқтисодиёти мамлакат ва сатҳи зиндагии мардум заминаи мусоид мегузорад, дастуру супоришҳои мушаххас доданд.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520