Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Ҳиндустон хонум Пратибҳа Патил дар маҷмааи давлатии Кохи Борбади пойтахт дар тантанаҳои фарҳангии бахшида ба солгарди 18-уми истиқлоли давлатии Тоҷикистон иштирок намуданд.
Эмомалӣ Раҳмон ва хонум Пратибҳа Патил зимни суханронии кӯтоҳ, ки қабл аз оғози чорабиниҳои идона доштанд, аҳли толор ва кулли мардуми Тоҷикистонро бо ин иди фархундаи миллӣ табрику таҳният гуфтанд.
Хотиррасон бояд намуд, ки паёми табрикии Президенти Ҷумҳурии Тоҷикистон Эмомалӣ Раҳмон, ки ба солгарди 18-уми истиқлоли давлатии Тоҷикистон бахшида шудааст, шоми дирӯз ва субҳи имрӯз тавассути шабакаҳои телевизионӣ ва радио пешкаши мардум гардид. Матни пурраи он ҳамчунин дар матбуоти даврӣ нашр мегардад.
Барномаи фарҳангии бахшида ба солгарди 18-уми истиқлоли давлатии Тоҷикистон аз намоишҳои ҷолиби театрикунондашуда, ки бозгӯ аз шебу фароз ва бурду бохти давлату ҳукумат ва мардуми кишвар дар 18 соли истиқлоли давлатианд ва аз рақсу сурудҳои дилошӯб иборат аст.
Бояд таъкид дошт, ки дар тантанаҳои истиқлоли давлатии Тоҷикистон иштирок намудани Президенти Ҷумҳурии Ҳиндустон, ки яке аз давлатҳои бузург ва пешрафтаи қитъаи Осиё аст, нишона аз эҳтироми хосаи ҳукумат ва мардуми ин кишвар ба Ватани азиз ва фарҳанги пурғановати он маънидод мегардад.
Президенти Ҳиндустон хонум Пратибҳа Патил ва Намояндагони воломақоми ин кишвар, ки ӯро дар сафари расмиаш ба Тоҷикистон ҳамроҳӣ мекунанд, тоҷикону ҳиндувонро, аз ҷумла ду шохаи дарахти безаволи тамаддуни ориёӣ меноманд ва бовар доранд, ки имкону захираҳои ҳамкории судбахш миёни ду кишвар ва ду мардуми ҳамфарҳанг дар воқеъ хеле фароханд, аз ҷумла дар соҳаҳои фарҳанг, маориф, тандурустӣ ва илму ва ин кишвар техника.