Президенти Ҷумҳурии Тоҷикистон

Мулоқот бо Намояндаи олии Иттиҳоди Аврупо оид ба корҳои хориҷӣ ва сиёсати амниятӣ Кэтрин Эштон

29.11.2012 14:43, шаҳри Душанбе

Имрӯз Президенти кишвар Эмомалӣ Раҳмон Намояндаи олии Иттиҳоди Аврупо оид ба корҳои хориҷӣ ва сиёсати амниятӣ Кэтрин Эштонро ба ҳузур пазируфт.

Дар оғози суҳбат Сарвари давлат Эмомалӣ Раҳмон изҳор дошт: «Тоҷикистон Иттиҳоди Аврупоро аз ҷумлаи шарикони муҳими байналмилалии худ медонад ва ба таҳкими робитаҳои дарозмуддату босубот бо он ҳамеша таваҷҷуҳи хоса дорад».

Дар мулоқот маҷмӯи васеи масоили ҳамкории гуногунҷанбаи Тоҷикистону Иттиҳоди Аврупо, аз ҷумла дар соҳаҳои сиёсат, амнияти минтақавию ҷаҳонӣ, иқтисод ва тиҷорат, илму техника ва рушди ҷомеаи демократӣ баррасӣ шуд.

Аз раванди Муколамаи сиёсии минтақавӣ миёни Тройкаи Иттиҳоди Аврупо ва Осиёи Марказӣ, ки ҷаласаи навбатиаш чанд рӯз пеш дар Қирғизистон баргузор гардид ва мулоқотҳои мунтазами миёни сохторҳои гуногуни Тоҷикистону Иттиҳоди Аврупо изҳори қаноатмандӣ карда шуд.

Бо зикри он, ки имрӯз Иттиҳоди Аврупо аз рӯи нишондодҳои гардиши мутақобилаи мол дар қатори панҷ шарики аввали тиҷоратии Тоҷикистон карор дорад, густариши бештари ҳамкории иқтисодию тиҷоратӣ зарур дониста шуд.

Сарвари давлати Тоҷикистон Эмомалӣ Раҳмон зимни муҳокимаи масоили вобаста ба таҳияи Стратегияи нави Иттиҳоди Аврупо доир ба Осиёи Марказӣ барои солҳои 2014 – 2020, аз ҷумла изҳор дошт: “Мо, албатта, манфиатдори қабули Стратегияи нави Иттиҳод ва дар чаҳорчӯби он ба роҳ мондани механизмҳои нави ҳамкорӣ аз қабили “Муколама оид ба амният” ҳастем”.

Таваҷҷуҳи зиёд ба авзои кунунӣ ва ояндаи Афғонистон ва амалӣ намудани чораҳои муштараки амниятӣ ва иҷтимоию иқтисодӣ зоҳир карда шуд. Дар ин замина татбиқи босамари лоиҳаҳои минтақавиии зербиноӣ, аз ҷумла дар бахшҳои энергетика, нақлиёту коммуникатсия ва рушди тиҷорат муҳим шумурда шуд.

Гуфтугӯи судманд, ҳамчунин доир ба рушди ҷомеаи шаҳрвандӣ, таъмини ҳуқуқу озодиҳои инсон, озодии матбуот ва дину эътиқод ва дигар мавзӯъҳои мавриди таваҷҷуҳ сурат гирифт.

Баъди анҷоми мулоқот миёни Ҳукумати Ҷумҳурии Тоҷикистон ва Комиссияи Иттиҳоди Аврупо як созишномаи нави ҳамкорӣ ба имзо расид, ки мутобиқи он барои баланд бардоштани рақобатпазирии соҳаи кишоварзии Тоҷикистон дар ҳаҷми 16 миллион евро кумаки молиявӣ дар шакли грант ҷудо карда мешавад.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон, 2005 - 2018
Тел/Факс.: (+992 37)2212520