Президенти Ҷумҳурии Тоҷикистон

Ифтитоҳи мактаби рақами 119 шаҳри Турсунзода

18.09.2015 10:21, шаҳри Турсунзода

Дар деҳаи Тойчии ҷамоати деҳоти Ҷура Раҳмонови шаҳри Турсунзода Президенти мамлакат Эмомалӣ Раҳмон ба оғози фаъолияти Муассисаи таҳсилоти умумии рақами 119 асос гузошт.

Дар даромадгоҳи бинои мазкур хонандагон бо барномаҳои рангини фарҳангии театрикунонидашуда Сарвари давлатро истиқбол гирифтанд. Зимни баромади хеш муҳассилин аз ваҳдату ягонагӣ ва сулҳу суббот шукргузорӣ намуданд.

Корҳои сохтмонӣ дар мактаби наву замонавӣ моҳи июли соли 2012 оғоз гардида, бо харҷи 23 миллиону 104 ҳазор сомонӣ аз ҳисоби Муассисаи давлатии «Мудирияти минтақаи зериобшавандаи Неругоҳи Барқии Обии «Роғун» бунёд гардидааст.

Муассисаи таълимӣ аз се ошёна иборат буда, 64 синфхона дорад. Мактаб аз озмоишгоҳҳои бо технологияҳои замонавӣ муҷаҳҳаз, маҷлисгоҳ бо 560 ҷой, толори китобхонӣ, ошхонаи барҳаво, инчунин синфхонаҳои алоҳида барои ташаккули завқи зебоипарастии кӯдакону наврасон, толори варзишӣ бо 325 ҷой иборат мебошад, ки дар як баст 1176 нафар хонандаро ба таҳсил фаро мегирад. Айни замон 400 нафар фарзандони сокинони маҳаллаи навбунёд дар ин муассиса таҳсили илм мекунанд, ки аз ин шумора 250 нафарашон фарзандони муҳоҷирони экологӣ аз ноҳияи Нуробод мебошанд.

 Сарвари давлат Эмомалӣ Раҳмон бо шароити таълим дар синфхонаҳои ибтидоӣ, компютерӣ, дӯзандагию дуредгарӣ шинос шуда, бо хонандагон суҳбати самимӣ доир кард.

Президенти кишвар Эмомалӣ Раҳмон баҳри боз ҳам беҳтар гардонидани сифати таълим ба роҳбарияти вазорати маориф дастуру супоришҳо дод. Хонандагон ба Сарвари давлат барои бунёди мактабу синфхонаҳои барҳаво изҳори сипос карданд. Дар ҷавоби ин дастгириҳо ваъда доданд, ки бо хониши хубу аъло ва омӯзиши илмҳои муосир оянда ҳамчун кадрҳои арзанда барои халқу ватан хизмат хоханд кард.

Дар синфи омӯзиши ҳунарҳо Сарвари давлат ба духти либосҳои миллӣ, ки худи духтарони синфҳои болоӣ омода кардаанд, баҳои баланд дода, онҳоро ба омӯзиши ҳунарҳои миллӣ, илм ва забонҳои хориҷӣ ҳидоят кард. Зимни шиносоӣ бо шароити мактаби нав ҳамчунин барои корҳои ободонӣ ба роҳбарияти мактаб тавсияҳои иловагӣ дода шуд. Маврид ба ёдоварист, ки дар муассиса буғхона бо технологияи ҳозиразамон муҷаҳҳаз гардонида шудааст, ки дар фасли зимистон имкон дорад, тамоми утоқҳои биноро бо ангишт ва неруи барқ гарм нигоҳ дорад. Дар рӯзҳои таҷлили 24 - солагии Истиқлолияти давлатӣ мавриди истифода қарор гирифтани муассисаи таълимӣ тӯҳфаи арзандаи Сарвари давлат Эмомалӣ Раҳмон ба фарзандони сокинони муҳоҷиршудаи шаҳри Турсунзода арзёбӣ гардид. Баъди ифтитоҳ ва шиносоӣ бо шароити таълим дар мактаби нав дар ҳаминҷо Сарвари давлат Эмомалӣ Раҳмон бо шумораи зиёди омӯзгорону хонандагон ва фаъолони шаҳр мулоқоти судманд доир намуд.

Президенти мамлакат Эмомалӣ Раҳмон ифтитоҳи мактаби навро ба сокинони ин маҳал муборакбод намуд.

Мавриди зикр аст, ки Ҳукумати мамлакат бо ташаббус ва дастгирии бевоситаи Президенти Ҷумҳурии Тоҷикистон Эмомалӣ Раҳмон барои 571 оилаи муҳоҷирон, ки дар деҳаи Тойчии ҷамоати деҳоти Ҷура Раҳмонови шаҳри Турсунзода муқимӣ шудаанд, тамоми шароитҳоро муҳайё кардааст. Аз ҷумла, бо маблағгузории ҳукумат Муассисаи давлатии «Мудирияти минтақаи зериобшавандаи Неругоҳи Барқии Обии «Роғун» бо харҷи беш аз 52 миллион сомонӣ роҳ, мактаб, бунгоҳи тиббӣ, хатти об, хатти интиқоли барқ, зеристгоҳи барқӣ ва дигар инфрасохтори заруриро бунёд кардааст.     

Ин корҳои ободонӣ аз ҷониби Ҳукумати мамлакат барои таъмини зиндагии сазовори сокинон идома дорад.

facebook
twitter
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
© Хадамоти матбуоти Президенти Тоҷикистон
Тел/Факс.: (+992 37)2212520