29 март Президенти Ҷумҳурии Тоҷикистон Эмомалӣ Раҳмон бо муовини  раиси Комиссияи молияи Сенати Фаронса Эймери де Монтескю мулоқот кард.

"Мо аз сатҳи имрӯзаи ҳусни тафоҳум ва эътимоди  дуҷонибаи ҳарду мамлакат дар ҷараёни равобити сиёсии Тоҷикистону Фаронса дар маҷмӯъ қаноатмандем. Тоҷикистон Фаронсаро дар Аврупо ҳамчун шарики асосии худ мешуморад. Мо тайёрем, ки ҳамкориро бо Фаронса дар соҳаҳои  гуногун равнақу ривоҷ диҳем", - гуфт Эмомалӣ Раҳмон.

Қайд карда шуд, ки умуман густариши муносибот бо мамлакатҳои узви Иттиҳоди Аврупо ва хусусан бо Фаронса,  ҳамчун яке аз давлатҳои пешрафтаи  Аврупо дар сиёсати берунии Тоҷикистон аҳамияти аввалиндараҷа дорад.  Ҳукумати Ҷумҳурии Тоҷикистон  ба равнақу ривоҷи ҳамаҷонибаи  ҳамкории мутақобилан муфиди иқтисодӣ бо ин кишвар манфиатдор мебошад.

Мусоҳибон дар ин хусус ҳамфикр буданд, ки ҳамкории фаъолонаи  иқтисодии Фаронса дар Тоҷикистон барои вусъати ҳамаҷониба ва дарозмуддати  ҳамкорӣ аҳамияти калон дорад, зеро Тоҷикистон барои пешрафти  бисёр соҳаҳои  иқтисодиёт дорои  имкониятҳои  фаровон мебошад.

Ба ақидаи Эмомалӣ Раҳмон  Тоҷикистон дар натиҷаи  ислоҳот дар бобати  пешрафти  иқтисодиёт ба комёбиҳои муайян ноил гардид. Дар мамлакат амалӣ сохтани  барномаҳои ҷиддӣ ва доманадор шурӯъ шуд. Имрӯз барои ҷалби фаъолонаи сармояи Фаронса ва технологияи он  бо мақсади амалӣ сохтани  барномаҳои  гуногуни  иқтисодӣ шароит муҳайё мебошад.