19 апрел Президенти Ҷумҳурии Тоҷикистон Эмомалӣ Раҳмон Раиси ҳозираи Созмони Амнияту Ҳамкории Аврупо, вазири корҳои хориҷии Словения Димитр Рупелро ба ҳузур пазируфт.

Дар ҷараёни мулоқот ҷонибҳо маҷмӯи васеъи масъалаҳои ҳамкорӣ ва дурнамои амалҳои мутақобилаи миёни Ҷумҳурии Тоҷикистон ва Созмони Амнияту Ҳамкории Аврупоро мавриди баррасӣ қарор доданд.

"Тоҷикистон саҳми Созмони Амнияту Ҳамкории Аврупоро ҳамчун механизми ҳамкории байналхалқӣ дар масъалаҳои таҳкими институтҳои демократӣ ва ташкили ҷомеаи шаҳрвандӣ муҳим арзёбӣ мекунад", таъкид намуд  Эмомалӣ Раҳмон.

Президенти Ҷумҳурии Тоҷикистон Эмомалӣ Раҳмон ба сатҳи ҳамкориҳо бо Созмони Амнияту Ҳамкории Аврупо, ки дар бартарафсозии ихтилофоти байни тоҷикон, таъсиси сохторҳои ҷомеаи шаҳрвандӣ ва демократикунонии низоми сиёсӣ нақши назаррас гузоштааст, баҳои баланд дод.

Раиси Созмони Амнияту Ҳамкории Аврупо раванди демократикунонии ҷомеаро дар Ҷумҳурии Тоҷикистон баланд арзёбӣ намуда, хусусияти инкишофёбандаи онро таъкид сохт.

Сарвари давлат ба масъалаҳои вобаста ба муносибатҳои миёни Ҷумҳурии Тоҷикистон ва Словения дахл намуда, манфиатдории Тоҷикистонро дар рушду густариши онҳо таъкид намуд.