20 апрел Президенти Ҷумҳурии Тоҷикистон Эмомалӣ Раҳмон  сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Носир Сармади Порсоро ба ҳузур пазируфт.

Дар мулоқот асосан масъалаҳои вобаста ба ҳамкориҳои иқтисодиву иҷтимоӣ ва илмиву фарҳангии Ҷумҳурии Тоҷикистон бо Ҷумҳурии Исломии Эрон баррасӣ шуданд.

"Ҷумҳурии Тоҷикистон,- изҳор дошт Эмомалӣ Раҳмон, -  аз инкишофи ҳамкориҳои иқтисодию тиҷоратӣ ва илмиву фарҳангии солҳои охир бо Ҷумҳурии Исломии Эрон қаноатманд аст".

Дар вохӯрӣ тазаккур дода шуд, ки сохтмони нерӯгоҳи барқи обии "Сангтӯда -2" ва ҳамдастии мутахассисони эронӣ дар сохтмони туннели Анзоб дар ҳамкориҳои дуҷониба марҳилаи сифатан боварибахшу созандаро эҷод намуд.

Тарафҳо таъкид сохтанд, ки тавсеаи робитаҳои дуҷониба асоси манфиат ва хоҳишҳои рӯзафзуни мардуми дӯсту бародари тоҷику эронӣ мебошад.