24 сентябр Президенти Ҷумҳурии Тоҷикистон Эмомалӣ Раҳмон асосгузори Карате-до Сито-рю дар собиқ Иттиҳоди Шӯравӣ, Президенти федератсияи Карате-до Сито-рюи Аврупову Осиё ва ноиби Президенти Федератсияи ҷаҳонии ҳамин навъи варзиш Сато Тетсуоро ба ҳузур пазируфт.
Дар мулоқот доираи васеи масоили рушду густариши варзиш ва саҳми Тоҷикистону варзишгарони он дар тарғибу ташвиқи тарзи зиндагии солим мавриди баррасӣ қарор гирифт.
Сато Тетсуо ба Президенти Ҷумҳурии Тоҷикистон Эмомалӣ Раҳмон барои саҳми намоён ва арзандааш дар рушду нумӯи Карате-до Сито-рю ва дигар намудҳои варзиш ва мусоидати ӯ дар ташкилу гузаронидани мусобиқаҳои варзишии минтақавию байналмилалӣ дар Тоҷикистон нишони рамзии Дани 5-уми камарбанди сиёҳи Карате-доро тақдим намуд.
Президенти Ҷумҳурии Тоҷикистон Эмомалӣ Раҳмон дар ҷаҳон дуюмин сиёсатмадор аст, ки бо ин мукофот сарфароз гардонда шуд.
Сарвари давлати Тоҷикистон ба Сато Тетсуо барои тақдими ин мукофот арзи сипос намуда, изҳор дошт, ки Тоҷикистон ва варзишгарони он минбаъд низ барои рушду нумӯи варзиш ва тарғибу ташвиқи он дар байни мардумони олам саҳми арзандаи худро хоҳанд гузошт.