27 сентябр Президенти Ҷумҳурии Тоҷикистон Эмомалӣ Раҳмон бо сарони ҳукуматҳо ва ҳайатҳои мамлакатҳои узви Иттиҳоди иқтисодии Авурупою Осиё мулоқот кард, ки барои иштирок дар маҷлиси навбатии Шӯрои байнидавлатии Иттиҳод ба Душанбе омадаанд.

Эмомалӣ Раҳмон зикр кард, ки Тоҷикистон ба равнақу ривоҷи ҳамкории минтақавӣ аҳамияти калон медиҳад ва Иттиҳоди иқтисодии Аврупою Осиё дар ин масъала воситаи хуб мебошад. "Мо ҷонибдори афзунтар сохтани самараи фаъолияти Иттиҳод мебошем", гуфт Сарвари давлати Тоҷикистон.

Зимни мулоқот роҷеъ ба масъалаҳои бештар сохтани самараи фаъолият, баланд бардоштани обрӯю эътибори Иттиҳод ва ривоҷ додани ҳамкории минтақавӣ табодули назар карда шуд.

Дар мулоқот ҷиҳатҳои гуногуни ҳамкорӣ дар соҳаҳои иқтисодиёт, нақлиёт, муносибатҳои гумрукӣ, истифодаи технологияи навтарин, ташаккули нархҳо ва масъалаҳои дигар муҳокима шуданд.