29 сентябр Президенти Ҷумҳурии Тоҷикистон Эмомалӣ Раҳмон гурӯҳи директорони иҷроияи Бонки аврупоии таҷдид ва рушдро бо сарварии Майкл Нюмаер ба ҳузур пазируфт.
Дар мулоқот доираи васеи масъалаҳои марбут ба вазъи ҳозира ва дурнамои рушди ҳамкории Ҷумҳурии Тоҷикистон бо Бонки аврупоии таҷдид ва рушд муҳокима шуд.
"Мо ташрифи Шуморо қадаме дар роҳи таҳкими ҳамкориамон барои барқарор намудани муносибатҳои зичи миёни Ҷумҳурии Тоҷикистон ва Бонки аврупоии таҷдид ва рушд мешуморем", - зикр намуд Президенти Ҷумҳурии Тоҷикистон Эмомалӣ Раҳмон ва афзуд, ки, - мамлакати мо нияти роҳбарияти Бонкро барои ба сатҳи сифатан нав баровардани муносибатҳоямон дастгирӣ менамояд".
Зимни мулоқот ҳамчунин дар бораи ҳамкории Ҷумҳурии Тоҷикистон бо Бонки аврупоии таҷдид ва рушд дар соҳаи маблағгузорӣ ба бонкҳои тиҷоратии маҳаллӣ, додани қарзҳо ба бахши воқеии иқтисодиёт, маблағгузории барномаҳои мухталифи соҳавӣ ва ҳамчунин дар бораи ҷалби инвеститсияҳо ба соҳаҳои энергетика, сохтмони роҳҳо, таъминоти об ва барномаҳои маҳаллӣ табодули афкор сурат гирифт.