3 октябр Президенти Ҷумҳурии Тоҷикистон Эмомалӣ Раҳмон Сафири Фавқулодда ва Мухтори Ҷумҳурии Ӯзбекистон дар Ҷумҳурии Тоҷикистон Бахтиёр Урдашевро ба муносибати анҷом ёфтани мӯҳлати ваколаташ ба ҳузур пазируфт.
Дар мулоқот масоили ҳамкориҳои мутақобилан судманди Тоҷикистону Ӯзбекистон дар доираи муносибатҳои дуҷонибаи ду кишвари ҳамсоя ва ҳам дар чаҳорчӯбаи созмонҳои минтақавӣ ба мисли ИДМ, Созмони ҳамкории Шанхай ва Созмони ҳамкории Осиёи Марказӣ мавриди баррасӣ қарор гирифт.
Дар ҷараёни сӯҳбат оид ба доираи васеи масоили муносибатҳои Тоҷикистону Ӯзбекистон мубодилаи афкор сурат гирифт. Қайд карда шуд, ки дар муносибатҳои дуҷонибаи ду кишвар пешравиҳо ба назар мерасад, вале ҳанӯз имкониятҳои истифода нашудаи таҳкиму тавсеаи онҳо зиёданд.
Дар мулоқот ҳамчунин ба масоили муносибатҳои ду кишвар дар соҳаи иқтисод, савдо, экология ва дигар самтҳои ҳамкорӣ табодули назар карда шуд.