15 ноябр Президенти Ҷумҳурии Тоҷикистон Эмомалӣ Раҳмон дар роҳи сафар ба Ҷумҳурии Тунис ҳангоми таваққуфи муваққатӣ дар Ереван бо Президенти Ҷумҳурии Арманистон Роберт Кочарян мулоқот намуд.
Дар вохӯрӣ маҷмӯи васеи масоили ҳамкориҳои Тоҷикистону Арманистон дар доираи муносибатҳои дуҷониба ва ҳам дар чаҳорчӯбаи созмонҳои байналмилалию минтақавӣ мавриди муҳокима қарор гирифтанд.
Ҷонибҳо атрофи мавқеи ду кишвар дар ҳалли масоили сиёсию иҷтимоӣ, иқтисодию фарҳангӣ ва ҷаҳонию минтақавӣ, татбиқи амалии санадҳои ҳуқуқие, ки дар доираи созмонҳои байналмилалӣ ба тасвиб расидаанд, мубодилаи афкор намуданд.
Дар мулоқот аз рушди имрӯза ва дурнамои ҳамкориҳои судбахши Тоҷикистону Арманистон изҳори қаноатмандӣ карда шуд.
Ҷонибҳо ҳамчунин атрофи масоили амнияти минтақавӣ, муборизаи муштарак бар зидди хатарҳои ҷаҳони имрӯза аз қабили терроризм, экстремизм ва гардиши маводи мухаддир табодули назар намуданд.