20 март Президенти Ҷумҳурии Тоҷикистон Эмомалӣ Раҳмон намояндагии Бонки ҷаҳониро бо сарварии таҳлилгари асосии молиявии он Рагувир Шарма ба ҳузур пазируфт.

Дар гуфтушунид намояндаи доимии Бонки ҷаҳонӣ дар Ҷумҳурии Тоҷикистон Ҷавдет Денизер иштирок дошт.

Дар рафти мулоқот намояндагии Бонки ҷаҳонӣ фикру мулоҳизаи худро нисбат ба нерӯи энергетикии содироти минтақавӣ дар Осиёи Марказӣ баён намуд.

Тарафҳо маҷмӯи масъалаҳои марбут ба талабот ба қувваи барқ дар минтақа, шаклҳои имконпазири таъмини ҳалли пешниҳодҳо барои қонеъ гардонидани талабот, татбиқи лоиҳаҳои калони ба нақшагирифташудаи энергетикии минтақа, аз ҷумла сохтмони нерӯгоҳҳои барқи обии Роғун ва Сангтӯдаро бо назардошти талаботи мамлакатҳои ниёзманд, рақобатнокии лоиҳаҳои зикршуда дар соҳаи содирот, ки барои татбиқи ин лоиҳаҳо ва азхуд кардани бозорҳои содиротӣ заруранд, мавриди муҳокима қарор доданд.