Президенти Ҷумҳурии Тоҷикистон Эмомалӣ Раҳмон Вазири нафту гази Ҷумҳурии Ҳиндустон Мурли Деораро, ки бо ҳадафи иштирок дар ҷаласаи навбатии Шӯрои сарони давлатҳои аъзои Созмони ҳамкории Шанхай ба шаҳри Душанбе ташриф оварда буд, ба ҳузур пазируфт.

Дар мулоқот масоили ҳамкории гуногунҷанбаи Тоҷикистону Ҳиндустон баррасӣ шуд.

Сарвари давлат Эмомалӣ Раҳмон муносибатҳо бо Ҳиндустонро аз самтҳои афзалиятноки сиёсати хориҷии Тоҷикистон арзёбӣ карда, аз болоравии ҳаҷми мубодилоти молу маҳсулот ва ҳамкориҳои ҳарбӣ-техникии ду кишвар изҳори қаноатмандӣ намуд.

Ҷудо гаштани грант баҳри таҷдиди нерӯгоҳи обии Варзоб, сохтмони як меҳмонхонаи ҳозиразамон дар шаҳри Душанбе аз ҷониби ширкати ҳиндии СИ-ЭЙЧ-ЭЛ ва дигар тадбирҳои пурарзиш нишона аз ҳусни нияти роҳбарияти Ҳиндустон ба рушди ҳамкориҳои босамар бо Тоҷикистон маънидод гашт.

Мусоҳибон ҳамчунин оид ба робитаҳо дар доираи Созмони ҳамкории Шанхай ва дигар ташкилоти минтақавию байналмилалӣ гуфтугӯ анҷом доданд.

Зимни сӯҳбати пурмӯҳтаво ҷонибҳо омодагии худро баҳри таҳкиму густариши ҳамкориҳои минбаъда таъкид намуданд.