Аз ҷониби Президенти Ҷумҳурии Тоҷикистон якчанд қонунҳои Ҷумҳурии Тоҷикистон, ки аз тарафи Маҷлиси намояндагони Маҷлиси Олии Ҷумҳурии Тоҷикистон қабул гардида, Маҷлиси миллии Маҷлиси Олии Ҷумҳурии Тоҷикистон онҳоро ҷонибдорӣ намудааст, ба имзо расиданд.
Қонунҳои Ҷумҳурии Тоҷикистон «Дар бораи хазинадорӣ», «Дар бораи сирри тиҷоратӣ», «Дар бораи суғуртаи тиббӣ», «Дар бораи ҳуқуқи дастрасӣ ба иттилоот», ва Қонуни Ҷумҳурии Тоҷикистон «Дар бораи ворид намудани тағйиру иловаҳо ба Қонуни Ҷумҳурии Тоҷикистон «Дар бораи танзими расму оинҳо» аз ҷумлаи онҳо мебошанд.
Қонунҳои ба имзорасида, пеш аз ҳама бо мақсади таъмини ҳамаҷонибаи ҳуқуқу озодиҳои инсон, рушди минбаъдаи ҳаёти иқтисодию иҷтимоии кишвар ва такмили қонунгузории ҷумҳурӣ қабул карда шудаанд. Амалӣ гардидани онҳо барои рушду нумӯ ва пешрафти минбаъдаи ҳаёти ҷомеа мусоидат хоҳад кард.