14 ноябр дар идомаи сафари корӣ дар ноҳияи Бобоҷон Ғафурови вилояти Суғд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи омодагиҳо ба таҷлили шоистаи ҷашни бузурги миллӣ - 35-солагии Истиқлоли давлатӣ дар деҳоти Хистеварз Муассисаи таълимии давлатии “Литсейи рақами 1”-ро мавриди баҳрабардорӣ қарор доданд.

Муассисаи типи нав, ки дар доираи татбиқи сиёсати маорифпарваронаи роҳбарияти олии сиёсии Тоҷикистон бо фармоиши Идораи сохтмони асосии Мақомоти иҷроияи ҳокимияти давлатии вилояти Суғд бунёд шудааст, барои 2400 хонанда дар ду баст пешбинӣ гардида, аз лиҳози меъморию сохтмонӣ ва фарогирии шумораи зиёди муҳассилин ба таълиму тарбия, дар ҳудуди вилояти Суғд назир надорад.  

 Бунёди бинои муҳташами чорошёнаи Литсейи №1 дар Хистеварз, ки аз калонтарин деҳоти ноҳияи Бобоҷон Ғафуров ба ҳисоб рафта, наздики 60 ҳазор аҳолӣ дорад, аз ҷумлаи тадбирҳои вобаста ба татбқии ҳамаҷонибаи “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” маҳсуб меёбад. Дар ин муассисаи типпи нав равияи таълим асосан тариқи омӯзиши  илмҳои табииву риёзӣ ба роҳ монда шудааст. Ин усули муосири илмомӯзӣ барои сайқал додани тафаккури техникии хонандагон мусоидат мекунад.

Пешвои миллат муҳтарам Эмомалӣ Раҳмон зимни шиносоӣ бо имконияту шароити илмомӯзӣ дар иншооти тозабунёд, ба сифати корҳои сохтмонӣ баҳои баланд дода, ҳайати омӯзгоронро ҷиҳати талоши бештар ба харҷ додан ба сифати таълиму тарбия ва таҳкими ғояҳои худшиносиву худогоҳии насли наврасу ҷавон ҳидоят намуданд.

Дар ин боргоҳи маърифат таълиму тарбияи хонандагон мутобиқ ба меъёрҳои байналмилалӣ ба роҳ монда шуда, тариқи озмун зиёда аз 80 нафар омӯзгорони соҳибтаҷриба ба кор ҷалб гардидаанд.

Бинои асосии Литсейи №1 дорои 48 синфхонаи муҷаҳҳази фаннӣ, озмоишгоҳҳои замонавӣ ва ҳуҷраҳои кории омӯзгорон мебошад.

Дар ин муассисаи нави таълимӣ ҳамаи синфхона ва озмоишгоҳҳо бо пешрафтатарин технология ва воситаҳои муосири илмомӯзӣ, ба монанди тахтаҳои электронӣ ва компютерҳо муҷаҳҳаз карда шуда, дар ин баробар ҷиҳати ҷалби густурдаи духтарону писарон ба касбомӯзӣ марказҳои ҳунаромӯзиву маҳфилҳои эҷодӣ ташкил карда шудааст.

Литсей ҳамчунин дорои синфхонаи омодагии дифои ҳарбӣ, синфхонаи алоҳидаи омӯзиши шоҳмот, бунгоҳи тиббӣ, китобхона бо толори хониш, ошхонаи замонавӣ барои 200 нафар, толори зебои маҷлис бо 300 ҷойи нишаст ва толори васею барҳавои варзишӣ мебошад.

Толори варзишӣ, ки барои машқу тамрини намудҳои гуногун пешбинӣ шудааст, пеш аз ҳама дар тарғиби тарзи ҳаёти солим байни хонандагон ва омода намудани варзишгарони оянда нақши асосӣ хоҳад дошт.

Ҳамзамон барои гузаронидани дарсҳои амалии омодагии дифои ҳарбӣ дар ҳудуди муассиса як майдончаи замонавӣ сохта шудааст.

Тамоми биноҳои таълимгоҳ бо маркази гармидиҳии худмухтор, ки дар ҳудуди муассиса сохта шудааст, пайваст буда, гармии синфхонаҳо ва дигар иншооти муассиса дар айёми сардиҳо пурра таъмин карда мешавад.

Саҳн ва атрофи иншоот сабзкорӣ шуда, бо гулу буттаҳои мавсимии ороишӣ зиннат ёфтааст.

Сарвари давлат муҳтарам Эмомалӣ Раҳмон аснои шиносоӣ бо шароити фароҳамшуда аз хонандагони ин муассисаи таълимӣ даъват ба амал оварданд, ки дар замони пешрафту дигаргуниҳои куллӣ дар ҷаҳон, аз ҷумла  рушди бесобиқаи илму техника пайваста пайи омӯзиш бошанд ва дар оянда ҳамчун кадрҳои баландихтисос дар ободию тараққиёти Тоҷикистони соҳибистиқлол саҳми арзандаи худро гузоранд.