Президенти Ҷумҳурии Тоҷикистон Эмомалӣ Раҳмон Роҳбари намояндагии Хазинаи байналмилалии асъор Карлос Пинеруаро ба ҳузур пазируфт.

Дар мулоқот масоили ҳамкории Тоҷикистон бо ин ва дигар муассисаҳои байналмилалии молиявӣ баррасӣ шуд.

Гуфтугӯйи судманд дар бораи барқарорсозии боварию эътимоди костагаштаи байни Тоҷикистон ва Хазинаи байналмилалии асъор сурат гирифт.

Карлос Пинеруа аз натиҷаҳои фаъолияти дуҳафтаинаи гурӯҳи кории Хазинаи байналмилалии асъор дар Тоҷикистон ба Сарвари давлат Эмомалӣ Раҳмон гузориш дода, аз ҷумла изҳор намуд, ки баҳри идомаи ҳамкорӣ ва барқарор сохтани фазои боварии байниҳамдигарӣ мо ба мувофиқа расидем. Зикр гардид, ки бартарафсозии монеаҳои мавҷудаи ҳамкорӣ мутобиқи як барномаи махсус амалӣ гашта, барои татбиқи барномаҳои дигари пурманфиат замина эҷод мешавад. Таъкид гашт, ки санҷиши қарибулвуқӯъи фаъолияти Бонки миллии Тоҷикистон ва таъмини шаффофияти сиёсати пулию қарзии он қадами асосӣ дар барқарорсозии фазои боварӣ ва густариши ҳамкории минбаъда хоҳад буд.

Сарвари давлат Эмомалӣ Раҳмон ба Карлос Пинеруа ва дигар намояндагони Хазинаи байналмилалии асъор барои кӯшиши муҳайёсозии шароити мусоиди ҳамкорӣ бо Тоҷикистон арзи сипос намуд.