Президенти Ҷумҳурии Тоҷикистон Эмомалӣ Раҳмон Директори иҷрокунандаи Хазинаи байналмилалии асъор Томас Мозерро ба ҳузур пазируфт.
Дар мулоқот масоили кунунӣ ва дурнамои ҳамкории Тоҷикистон бо ин муассисаи бонуфузи байналмилалии молиявӣ баррасӣ шуд.
Мусоҳибон дар бораи вазъи макроиқтисодии Тоҷикистон, ҳамкории он бо кишварҳо ва муассисаҳои байналмилалии мададрасон, такмил додани низоми пулию қарзӣ ва санҷиши фаъолияти Бонки миллии Тоҷикистон гуфтугӯйи судманд анҷом доданд.
Томас Мозер ба тадбирҳои Ҳукумати Ҷумҳурии Тоҷикистон оид ба барқарорсозии фазои боварию эътимоди байниҳамдигарӣ бо Хазинаи байналмилалии асъор баҳои баланд дода, таъкид дошт, ки ӯ баҳри бартараф кардани монеаҳои ҳамкорӣ ба кишвари мо кӯмак мерасонад.
Ба гуфти Томас Мозер ӯ вазифадор аст, ки дар Хазинаи байналмилалии асъор аз манфиатҳои Тоҷикистон пуштибонӣ кунад.
Ҷонибҳо изҳори умеду боварӣ намуданд, ки ба зудӣ ҳамаи мушкилоти мавҷударо бартараф сохта, ба идомаи татбиқи босамари Стратегияи паст кардани сатҳи камбизоатӣ, ҳаллу фасли қарзҳои хоҷагиҳои пахтакор ва дигар самтҳои ҳамкорӣ заминаи муносиб эҷод мекунанд.