Президенти Ҷумҳурии Тоҷикистон Эмомалӣ Раҳмон аз сафири фавқулодда ва мухтори Ҷумҳурии Исломии Покистон дар Тоҷикистон Холид Усмон Қайсар эътимоднома қабул намуд.
Дар мулоқоти Сарвари давлат Эмомалӣ Раҳмон бо Холид Усмон Қайсар, ки баъди супоридани эътимоднома баргузор гашт, масоили густариши минбаъдаи муносибатҳои судманди Тоҷикистону Покистон баррасӣ шуд.
Президенти Ҷумҳурии Тоҷикистон Эмомалӣ Раҳмон дар оғози сӯҳбат изҳор дошт: - «густариш ва таҳкими равобит бо кишварҳои Осиёи Ҷанубӣ ва байни ду минтақа самти муҳими стратегияи хориҷии давлати мост». Дар робита ба ин ӯ ҳамчунин таъкид дошт, ки Тоҷикистон ба рушди муносибатҳо бо кишвари дӯсти Покистон таваҷҷӯҳи хос дорад.
Мусоҳибон бар он, ки муносибатҳои тиҷоратӣ ва иқтисодии ду кишвар ҷавобгӯи имкону захираҳои мавҷуда ва манфиатҳои ҳамдигар нестанд, ҳамфикрӣ зоҳир намуда, баҳри тавсиаи ҳамкориҳо дар татбиқи лоиҳаҳои минтақавии энергетикӣ, нақлиётиву коммуникатсионӣ, тиҷоратӣ ва илмию техникӣ гуфтугӯйи судманд анҷом доданд. Таваҷҷӯҳи хос ба иштироки Покистон дар бунёди нерӯгоҳи обии Роғун ва хатҳои минтақавии баландшиддати интиқоли нерӯи барқ зоҳир гардид.
Дар мулоқот ҳамчунин дар бораи мусоидат ба барқарорсозии иқтисодиёти Афғонистон, авзои кунунии иҷтимоию сиёсии он ва доир ба масоили амнияту субот дар минтақа ва ҷаҳон гуфтугӯ сурат гирифт.