Президенти Ҷумҳурии Тоҷикистон Эмомалӣ Раҳмон аз сафири фавқулодда ва мухтори Давлати Кувайт дар Тоҷикистон Азиз Раҳим ад - Деҳанӣ эътимоднома қабул намуд.
Дар сӯҳбати Сарвари давлат Эмомалӣ Раҳмон бо Азиз Раҳим ад - Деҳанӣ, ки баъди қабули эътимоднома ҷараён гирифт, масоили ҷорӣ ва дурнамои муносибатҳои Тоҷикистону Кувайт баррасӣ шуд.
Ҷонибҳо аз заминаи ҳуқуқию қарордодии ҳамкорӣ, ки байни ду кишвар мавҷуд аст, изҳори қаноатмандӣ карда, ривоҷ додани равобити сиёсӣ, иқтисодию тиҷоратӣ ва иштироки сармояи Давлати Кувайтро дар татбиқи лоиҳаҳои пурманфиати Тоҷикистон зарур шумурданд.
Гуфтугӯйи судманд дар бораи ба роҳ мондани ҳамкории ба ҳарду ҷониб судбахш дар соҳаҳои гидроэнергетика, нақлиёту коммуникатсия, саноати сабуку хӯрокворӣ, истихроҷи канданиҳои фоиданок ва нафту газ ва бунёди инфрасохтори туризм анҷом ёфт.
Дар мулоқот ҳамчунин атрофи авзои сиёсию иҷтимоии минтақа ва ҷаҳонӣ ва ҳамгироиҳои байналмилалӣ табодули назар карда шуд.