Президенти Ҷумҳурии Тоҷикистон Эмомалӣ Раҳмон бо роҳбарони сохторҳои қудратӣ ва мақомоти ҳифзи ҳуқуқу тартиботи кишвар машварати корӣ доир намуд.

Дар машварат масоили мубориза бо ҷинояткорӣ, аз ҷумла бо гардиши ғайриқонунии маводи мухаддир, татбиқи қонунҳои ҷумҳурӣ, таҷлили 63 солагии ғалаба дар Ҷанги Бузурги Ватанӣ, ғамхорӣ ба иштирокчиёну маъюбони ҷанг ва ҳамчунин масъалаи иҷрои нишондодҳои Паёми Президенти Ҷумҳурии Тоҷикистон ба Маҷлиси Олии мамлакат баррасӣ шуд.

Сарвари давлат Эмомалӣ Раҳмон ба онҳо баҳри таъмини волоияти қонун, таҳкими тартиботи ҳуқуқӣ дар ҷомеа, пешгирӣ аз ҷинояткорӣ, тарбияи ҳуқуқии шаҳрвандон ва дигар корҳои судманд супоришҳои қатъӣ дод.

Дастур дода шуд, ки баҳри фаҳмондадиҳии нишондодҳои Паёми Президенти Ҷумҳурии Тоҷикистон ба кормандони худ ва иҷрои саривақтию босифати супоришҳои дар он омада нақшаи чорабиниҳои мушаххас таҳия карда шавад.

Дар робита ба ҷашни 63-солагии ғалаба дар Ҷанги Бузурги Ватанӣ бошад, онҳо вазифадор шуданд, ки ба собиқадорони ҷангу меҳнат ғамхории самимӣ зоҳир намоянд.