Президенти Ҷумҳурии Тоҷикистон Эмомалӣ Раҳмон Комиссари олии Созмони Милали Муттаҳид оид ба гурезагон Антонио Гутйеррешро ба ҳузур пазируфт.
Дар мулоқот масоили ҳамкории Тоҷикистон бо ин муассисаи бонуфузи Созмони Милали Муттаҳид баррасӣ шуд.
Сарвари давлат Эмомалӣ Раҳмон ба нақши Идораи Комиссари олии Созмони Милали Муттаҳид оид ба гурезагон дар барқарорсозии сулҳу созиш дар Тоҷикистон баҳои баланд дода, ба саҳмгузорон арзи сипосу миннатдорӣ кард.
Антонио Гутйерреш Тоҷикистонро намунаи тобони ҳамгироии Идораи Комиссари олии Созмони Милали Муттаҳид оид ба гурезагон бо як кишвари алоҳида номида, аз ҷумла таъкид дошт, - «имрӯз Тоҷикистон натанҳо мушкилии гурезагони худро пурра ҳаллу фасл намудааст, балки ба фирориёни давлати Афғонистон кӯмаки беғаразона мерасонад ва дар таъмини субот дар Осиёи Марказӣ нақши муҳим мегузорад». Ӯ ҳамчунин изҳор дошт: - «мо мехоҳем дар мисоли таҷрибаи нодири Тоҷикистон кори худро дар дигар нуқтаҳои доғи олам босамар ба роҳ монем».
Ҷонибҳо оид ба ҷанбаҳои гуногуни ҳамкории Тоҷикистон бо ин ва дигар сохторҳои Созмони Милали Муттаҳид, танзими муҳоҷирати меҳнатӣ, мусоидат ба барқарорсозии ҳаёти осоишта дар Афғонистон ва ба роҳ мондани ҳамкории босамари минтақавӣ дар Осиёи Марказӣ гуфтугӯи судманд анҷом доданд.