Президенти Ҷумҳурии Тоҷикистон Эмомалӣ Раҳмон Ноиби Президенти Бонки умумиҷаҳонӣ Шигео Катсуро ба ҳузур пазируфт.

Дар вохӯрӣ масоили ҳамкории Тоҷикистон бо ин муассисаи муътабари молиявӣ баррасӣ шуд.

Ҷонибҳо дар бораи вазъи имрӯзаи макроиқтисодии Тоҷикистон ва дурнамои рушди он, ҳамоҳангсозии кор бо муассисаҳои байналмилалии молиявӣ ва кишварҳои мададрасон дар самтҳои ҳаллу фасли қарзҳои хоҷагиҳои пахтакор ва татбиқи лоиҳаҳои энергетикӣ гуфтугӯи судманд анҷом доданд.

Таваҷҷӯҳи зиёд ба масоили тезондани омодасозии асоснокии техникию иқтисодии лоиҳаи сохтмони нерӯгоҳи обии Роғун, таҷдиди нерӯгоҳҳои обии амалкунанда, бунёди нерӯгоҳҳои ҳароратии ангиштӣ ва ба ташкили бозори минтақавии нерӯи барқ зоҳир гардид.

Дар мулоқот ҳамчунин пиромуни равандҳои глобалии иҷтимоию иқтисодӣ, таъсири он ба иқтисодиёти кишварҳои алоҳида ва роҳҳои ҳимояи бозори истеъмолӣ табодули назар карда шуд.