Президенти Ҷумҳурии Тоҷикистон Эмомалӣ Раҳмон Вазири давлатии адлия, фиристодаи махсуси Президенти Ҷумҳурии Сенегал Серин Диопро баҳузур пазируфт.

Вазири давлатии адлия, фиристодаи махсуси Президенти Ҷумҳурии Сенегал дар оғози мулоқот нахуст ба Президенти Ҷумҳурии Тоҷикистон Эмомалӣ Раҳмон номаи махсуси Президенти кишварашро, ки дар он аз Сарвари Давлати Тоҷикистон барои иштирок дар Саммити навбатии Созмони Конфронси Исломӣ даъват ба амал оварда шудааст супорид.

Зимни мулоқоти пурмўҳтаво Президенти Ҷумҳурии Тоҷикистон Эмомалӣ Раҳмон изҳор дошт, ки Тоҷикистон дар чаҳорчўбаи сиёсати усулии равобит ва ҳамкории васеъу мутақобилан судман бо ҳама минтақа ва давлатҳои ҷаҳон ба рушди муносибатҳои дўстона ва ҳамкории амалӣ бо кишварҳои олами ислом, аз ҷумла бо Ҷумҳурии Сенегал ҳавасманд мебошад.

Дар мулоқот изҳори боварӣ карда шуд, ки кишварҳои мусулмонӣ қодиранд, ки бо кўшишҳои муштарак сатҳи баланди зиндагӣ ва пешрафти тарақиёти бештареро ноил гарданд.

Вазири давлатии адлияи Ҷумҳурии Сенегал Серин Диоп дар мулоқот аз ҳавасмандии давлаташ бобати рушди муносибатҳо бо Тоҷикистон ёдовар шуда изҳори боварӣ намуд, ки иштироки Сарвари давлати Тоҷикистон Эмомолӣ Раҳмон дар чорабиниҳои давлатҳои исломи қадами устувору таҳқимбахшандаи муносибатҳои гуногунҷабҳаи давлатҳои узви Созмони Конфронси Исломӣ мегардад.

Дар мулоқот ҳамчунин масоили марбут ба вазъият дар бархе аз кишварҳои мусулмонӣ, аз қабили Афғонистон, Ироқ, Судон ва шиддатёбии авзоъ дар Шарқи наздик мавриди баррасӣ қарор дода шуд.