Президенти Ҷумҳурии Тоҷикистон Эмомалӣ Раҳмон аз Сафири нави фавқулодда ва мухтори Ҷумҳурии Исломии Эрон Алиасғар Амир Шеърдӯст эътимоднома қабул намуд.
Дар мулоқоти Сарвари давлат Эмомалӣ Раҳмон бо Алиасғар Амир Шеърдӯст, ки баъди маросими супурдани эътимоднома ҷараён дошт, масоили ҷорӣ ва дурнамои муносиботи Тоҷикистону Эрон баррасӣ шуд.
Президенти мамлакат Эмомалӣ Раҳмон мавкеи усулии Тоҷикистонро бобати рушди харчи бештари равобити дӯстона таъкид намуда, аз оғоз ёфтани марҳилаи ҳамкориҳои бунёдӣ ва стратегӣ дар муносиботи иқтисодию техникии ду кишвар изҳори қаноатмандӣ кард.
Нақбҳои мошингарди Истиқлолу Чормағзак, нерӯгоҳи обии Сангтӯда-2 ва дигар иншооти стратегӣ, ки бо дасти бародарони тоҷику эронӣ бунёд меёбанд, намунаҳои ҳамкории пурсамари иқтисодии Тоҷикистону Эрон маънидод гаштанд.
Алиасғар Амир Шеърдӯст изҳор дошт, ки барои суръат бахшидани корҳо дар иншооти муштараки ду кишвар, ки дар Тоҷикистон бунёд меёбанд, ҷаҳду талош хоҳад кард, бахусус барои қабл аз мӯҳлати муайяншуда ба кор даровардани нерӯгоҳи обии Сангтӯда-2.
Ҷонибҳо омодагии устувори худро баҳри идомаи босамари ҳамкории гуногунҷанбаи ду кишвари дӯсту ҳамзабон таъкид намуданд.
Дар мулоқот ҳамчунин атрофи авзои кунунии минтақа ва ҷаҳон ва равандҳои сиёсии мавҷуда табодули назар карда шуд.