Бегоҳии рўз Президенти Ҷумҳурии Тоҷикистон Эмомалӣ Раҳмон Сафири фавқулодда ва мухтори Ҷумҳурии Исломии Эрон дар Тоҷикистон Алиасғари Шеърдўстро ба ҳузур пазируфт.
Дар оѓози сўҳбат Алиасғари Шеърдўст даъватномаи Президенти Ҷумҳурии Исломии Эрон Маҳмуди Аҳмадинажодро ба Сарвари давлати Тоҷикистон Эмомалӣ Раҳмон тақдим намуд. Маҳмуди Аҳмадинажод аз Эмомалӣ Раҳмон даъват намудааст, ки дар ҷашни байналмилалии Наврўзи имсола дар Ҷумҳурии Исломии Эрон иштирок намояд.
Дар мулоқот ҳамчунин масоили ҳамкории гуногунҷанбаи Тоҷикистону Эрон, аз ҷумла татбиқи амалии санадҳои миёни ду кишвар баимзорасида, баррасӣ шуд.
Бинобар гузориши Алиасғари Шеърдўст, ба хотири рушди минбаъдаи ҳамкории дуҷониба, Ҷумҳурии Исломии Эрон тасмим дорад, ки дар Тоҷикистон бо харҷи 500 миллион доллари амрикоӣ як корхонаи истеҳсоли семент бо иқтидори солонаи 2 миллион тонна бунёд карда, ҳамчунин як донишгоҳи техникию технологӣ, як донишгоҳи умури сайёҳӣ ва ду шифохона ифтитоҳ намояд.
Таъкид гардид, ки навбати аввали нерўгоҳи барқии Сангтўда – 2 то Ҷашни солгарди 20 истиқлоли давлатии Тоҷикистон мавриди баҳрабардорӣ қарор мегирад.
Дар мулоқот ҳамчунин доир ба дигар мавзўъҳои мавриди таваҷҷўҳ гуфтугў сурат гирифт.