Президенти Ҷумҳурии Тоҷикистон Эмомалӣ Раҳмон Раиси Кумитаи Шўрои Федератсияи Русия доир ба Иттиҳоди Давлатҳои Мустақил Андрей Малчановро, ки бо як ҳайати бонуфуз ба шаҳри Душанбе ташриф овардааст, ба ҳузур пазируфт.

Дар мулоқот масоили ҳамкории гуногунҷанбаи Тоҷикистону Русия, аз ҷумла дар чаҳорчўби Иттиҳоди Давлатҳои Мустақил, баррасӣ шуд.

Ҳарду ҷониб омодагии худро барои таҳкими мақом ва нақши Иттиҳоди Давлатҳои Мустақил дар раванди рушди ҳамкории судманди кишварҳои аъзои он, хусусан имсол - дар чаҳорчўби раёсати Тоҷикистон дар ин созмон, таъкид намуданд.

«Ба Тоҷикистон вогузор намудани раёсат дар Иттиҳоди Давлатҳои Мустақил дар соли 20 солагии таъсиси ин созмони минтақавӣ нишонаи эътимоди баланд ба кишвари Шумо аст», - иброз дошт Андрей Молчанов зимни сўҳбат бо Сарвари давлати Тоҷикистон Эмомалӣ Раҳмон ва изҳори боварӣ намуд, ки натиҷаҳои раёсати Тоҷикистон назаррас хоҳанд буд.