Президенти Ҷумҳурии Тоҷикистон Эмомалӣ Раҳмон Директори минтақавии Бонки ҷаҳонӣ доир ба кишварҳои Осиёи Марказӣ Моту Кониши ва Намояндаи нави ин бонк дар Тоҷикистон хонум Марша Оливро ба ҳузур пазируфт.
Дар оғози сўҳбат Моту Кониши ба Эмомалӣ Раҳмон Намояндаи нави ин бонк дар Тоҷикистон Марша Оливро муаррифӣ намуда, ҳавасмандии устувори Бонки ҷаҳониро ба густариши минбаъдаи ҳамкорӣ бо кишвари мо таъкид намуд.
Дар мулоқот масоили ҳамкории Тоҷикистону Бонки ҷаҳонӣ баррасӣ шуд.
Таваҷҷўҳи асосӣ ба дастгирии рушди иҷтимоию иқтисодии Тоҷикистон дар давраи бартарафсозии оқибатҳои бўҳрони ҷаҳонии молиявию иқтисодӣ ва дар шароити болоравии нархи маҳсулоти нафтӣ ва озуқаворӣ зоҳир карда шуд.
Масоили вобаста ба ташхиси техникию иқтисодӣ ва баҳодиҳии таъсири иҷтимоию экологии лоиҳаи бунёди нерўгоҳи Роғун ва хатти баландшиддати барқии КАСА – 1000 низ мавриди баррасӣ қарор гирифт. Изҳори боварӣ карда шуд, ки кори коршиносони бонуфузи ҷаҳонӣ бо сифати баланд ва дар мўҳлатҳои муайяншуда ба поён расида, ба ҳамаи баҳсҳои атрофи ин лоиҳа дар минтақа хотима мегузорад.