Нимаи дуюми рўз Президенти Ҷумҳурии Тоҷикистон Эмомалӣ Раҳмон бо роҳбарону масъулони вазорату идораҳо, мақомоти иҷроияи ҳокимияти давлатии вилоятҳо ва шаҳру навоҳӣ машварати корӣ доир намуд.
Дар машварат вазъи молиявӣ дар се моҳаи аввали соли равон, вусъати киштукори баҳорӣ, масоили таъмини амнияти озуқавории кишвар ва омодагӣ ба истиқболи сазовори солгарди 20 истиқлолияти давлатии Тоҷикистон баррасӣ шуд.
Тавре зикр гардид, дар се моҳи аввали соли равон пешравиҳо дар ҳамаи соҳаҳо нисбат ба ҳамин давраи соли гузашта ба назар расида, афзоиши маҷмўи маҳсулоти дохилӣ 6,5% -ро ташкил дод ва ба 4,4 миллиард сомонӣ баробар шуд. Ба буҷети давлатӣ то 1 апрели соли равон 1 миллиарду 472 миллион сомонӣ ворид шуда, нақшаи даромадҳо ба он 107% иҷро гардид. Ин нишондод нисбат ба соли гузашта 500 миллион сомонӣ зиёд аст.
Дар баробари ин таъкид гардид, ки қисми хароҷоти буҷет низ рў ба афзоиш дорад. Аз рў аз роҳбарони тамоми сохторҳои марбута талаб карда шуд, ки барои афзун намудани нишондодҳои истеҳсолӣ дар соҳаҳои афзалиятноки иқтисоди миллӣ, аз ҷумла саноат, энергетика, кишоварзӣ ва ғайра ва ба ин васила таъмин намудани рушди иҷтимоию иқтисодии кишвар тадбирҳои муассир андешанд.
Супоришҳои мушаххас доир ба вусъат додани киштукори баҳорӣ, васеъ ба роҳ мондани кишти такрорӣ, истифодаи босамар аз заминҳои обӣ, азхуднамоии заминҳои нав ва муҳайё кардани ҷойҳои корӣ дода шуд.
Бори дигар таъкид гардид, ки аз нерўи барқ ва захираҳои обӣ сарфакорона ва самаранок истифода баранд.
Дар назди масъулин, ҳамчунин доир ба истиқболи арзанда аз солгарди 20 истиқлолияти давлатии Тоҷикистон вазифаҳои мушаххас гузошта шуд.