Президенти кишвар Эмомалӣ Раҳмон Ёвари котиби давлатии Иёлоти Муттаҳидаи Амрико оид ба масоили Осиёи Ҷанубӣ ва Марказӣ Роберт Блейкро ба ҳузур пазируфт.

Дар мулоқот масоили мавриди таваҷҷўҳи ду кишвар дар муносиботи дуҷониба ва мавзўъҳои ҳамкории минтақавию байналмилалӣ баррасӣ шуд.

ҳарду ҷониб бори дигар омодагӣ ва ҳавасмандии устувори худро ба густариши робитаҳои мутақобилан судманд, пеш аз ҳама дар самти мусоидат ба барқарорсозии иқтисодиёту иҷтимоиёт ва ҳаёти осоишта дар Афғонистон таъкид намуданд.

Роберт Блейк ба мавқеи Тоҷикистон дар минтақаи Осиёи Марказӣ ва нақши он дар рушди ҳамкории минтақавӣ баҳои баланд дода, аз номи ҳукумати Иёлоти Муттаҳидаи Амрико ба Сарвари давлат Эмомалӣ Раҳмон ва мардуми кишвар барои мусоидати ҳамаҷониба ба эҳёи эътидолу низом дар Афғонистон арзи сипос намуд.

Доир ба густариши минбаъдаи ҳамкорӣ ва мусоидат ба рушди иқтисодиёти Афғонистон, аз ҷумла тавассути татбиқи лоиҳаҳои минтақавии зербиноӣ дар соҳаҳои нақлиёту коммуникатсия, энергетика, кишоварзӣ ва ғайра гуфтугўйи судманд сурат гирифт.

Зарурати зиёд намудани истеҳсоли нерўи барқ дар Тоҷикистон ва кашидани хатти баландшиддати интиқоли нерўи барқи КАСА – 1000 ба Афғонистону Покистон ва ҳамчунин сохтмони роҳҳои нави минтақавии оҳану мошингард ва ба ҳам пайвастани шабакаҳои энергетикию нақлиётии кишварҳои Осиёи Марказӣ ва Осиёи ҷанубӣ таъкид гардид.

Аз ҳамкории дуҷонибаи сохторҳои низомӣ ва ҳифзи ҳуқуқи Тоҷикистону Амрико, ки ба таҳкими амнияту суботи минтақавӣ равона гаштааст, изҳори қаноатмандӣ карда шуд.

Дар мулоқот, ҳамчунин масоили дигари мавриди таваҷҷуҳи ду кишвар баррасӣ шуд.