Президенти Ҷумҳурии Тоҷикистон Эмомалӣ Раҳмон Дабири кулли Иттиҳоди иқтисодии Евразия Таир Мансуровро ба ҳузур пазируфт.
Дар мулоқот масоили ҳамкории Тоҷикистон дар доираи ин созмони минтақавӣ баррасӣ шуд.
"Мо дар Тоҷикистон ба Иттиҳоди иқтисодии Евразия умедҳои зиёд мебандем ва муътақидем, ки давлатҳои аъзои он маҳз тавассути муттаҳидсозии имконоти муштарак метавонанд рушди устувори иқтисодиро таъмин намуда, сатҳи зиндагии мардумони худро баланд бардоранд".
Ҷонибҳо оид ба рушди ҳамкориҳо баҳри фаъол намудани Иттиҳоди гумрукӣ, бунёди фазои ягонаи иқтисодӣ дар қаламрави кишварҳои аъзои иттиҳод ва консорсиуми обию энергетикӣ дар Осиёи Марказӣ ва ҳамчунин доир ба ҷоннок намудани корҳо баҳри ворид шудан ба Созмони Умумиҷаҳонии савдо мубодилаи судманди афкор анҷом доданд.
Зимни сӯҳбат таъкид гардид, ки санадҳои дар доираи Иттиҳод қабулгардида бояд аз ҷониби ҳамаи кишварҳои аъзои он баробар амалӣ шаванд.
Мусоҳибон ҳамчунин оид ба масоили рӯзномаи ҷаласаи навбатии Шӯрои сарони ҳукуматҳои кишварҳои аъзои Иттиҳод андешаронӣ карда, изҳори умед доштанд, ки зимни ин ҳамоиш дар самтҳои мазкур пешравиҳои назаррас ба даст меоянд.